أذكر الله لا ذكرت ان الخلايق تختلف

واحمده في طيب ناسٍ لاْقبلوا هَبّ النسيم

وآتعوّذ من مراضى يعلفون امْن العَلَف

همّهم واللي شغلهم ( كيف اقوم ؟ ) ( ووين اقيم ؟ )

كن ما ف الكون غيري ألّفوا عنّي مَلَف

وعذربوا بي لين داخوا من رجال ومن حريم

واحدٍ يخلق إشاعه وثانيٍ فيها حَلَف

وثالثٍ صدّق ، ورابع تايهٍ في ( س / ج )

إن رحلت بصمت قالوا : شايفينه في مَلَف

وان نويت آلف ربّي وحده بسرّي عليم

وان سهرت بشعر ليله قالوا : لربعه ذَلَف

يوم انا بالحزن ضايق بين طيّات العتيم

ليتهم (إستوعبوني) جعل مامنهم خَلَف

لو به استيعاب يمكن بدّلوا قيظي بغيم

وليت فيهم من يقدّر لو على "بند السّلَف

"وليت وقت الشّور ابلقى منّهم رايٍ سليم

كيف ابمدح قوم تظلم في شبابٍ ( ما وَلَف

من وراهم غير هَم وغير غَم وغير ضيم)

بعضهم معشر ثمين وغالبيّتهم تَلَف

ومن يصب الحب في من شَق قربتهم عظيم

باختصار الواقع اللي عن حكيهم إختلف

يثبت ان الحكي فاضي واشبه ب(حكي الحريم) !!