توك الحينه ذكرتي ليه يامال السلامه

كنت غايب عن غيابك ليه جيتي من جديد

جيتي البارح وانا سالي علي شكل ابتسامه

صفق الخافق وغنى من الوريد الي الوريد

رفرفت يابنت قلبي لاجل دمعاتك يمامه

طارت لعين حزينه بالاغاني والنشيد

ماابغي أقرأ في عيونك انكسارات الندامه

طرفك الله خالقه يملي عليه بالقصيد

مارميتي اذا رميتي طرفك البارع سهامه

خلت الخافق غنيمه وخلت عروقي عبيد

انسجمت في قدك المايس ويغريني انسجامه

شي ناقص عن ثيابك شي عن جسمك يزيد

كن بعضه حب جله لين فضل احتدامه

وكن جله شلّ بعضه لين عيا لا يحيد

كن شعرك شرب ليل الكون وابتل بعتامه

كلما رويت خصاله قال هلي من مزيد

اسالك بالله ثغرك ويش قصة انقسامه

جمرة الله قسمها نار تتحضن جليد

وماسالتك كيف صغتي في بياضك هالعلامه

وارتفعتي من قمر ساطع الي رتبة فريد

رغم هجرك كل نبض يحمد الله علي السلامه

انتهى عصر الحجارة وابتدا العصر الجديد ..