يالله يا اللي تفرج الهم لي زاد

إنك اتفرَج ضيقةٍ طاولتني

خلت حياتي كلها حزن وحداد

ولا جيت بنسى لحظةٍ ما نستني

لاارتحت في روحه ولاارتحت في اقعاد

أشيل همي وأحمله فوق متني

يا "مهدي" إن كانك عن الحال نشاد

فأنا هواجيس الفكر شاغلتني

المُر ذقته والتعاسه والإنكاد

وأساير الدنيا ولو عاندتني

الصدر ولع والجمر فيه وقاد

سعايرٍ فالجاش والله كوتني

تومي بي الدنيا على جمع وإفراد

ولحظاتي الحلوة حشا ما هنتني

"يابوحمد"صبري خذلني ولافاد

وهذي مقادير الليالي رمتني

"أبوك خالي"وأنت لي درع وإسناد

وأنا "سميه" والحظوظ أسعدتني

قرمٍ ولد قرمٍوللطيب معتاد

سيفٍ مجرب نظرته شوقتني

يا بوحمد بنصاك بد "آل فهاد "

وعلومك الذربة تراها لفتني

أشكي لك الدنيا وذا حال الأجواد

أطيعها لاشك ما طاوعتني

صرنا بها مابين صادر ووراد

محتلت فيها يومها ناشبتني

ما جاتني بالمشتهى طبعها عناد

بالطيب أجيها وبالجفا عاملتني

طفت المواقع كلها دار وإبلاد

أدور الراحة ولا واجهتني

ومن أولٍياأخوك والحظ منقاد

واليوم دورات الزمن توهتني

إليا برى جرحٍ تجي عقبه إجداد

هذي ورى هذي ةلا عبرتني

الله كريم ويفعل الله ماراد

في دبرته لو السعادة جفتني

ماكل طيرٍ يكفخ الريش صيَاد

وما كل فرصة لا غدت عاودتني

العمر مرَة والزمن درس واجهاد

والأيام والدنيا ترى علمتني

كلٍ يبي النوماس وعلوم لمجاد

ونفسي على العلياء تراها خذتني

ما همني جمع "الملايين" والزاد

قناعتي بالرزق هي ميَزتني

ما عندي آلة حاسبة وأضرب أعداد

عندي حياةٍ هادية واقنعتني

والرزق بيد اللي له الخلق سجاد

ايده كريمه لا عطت شبعتني

حنا تحت ظله مخاليق واعباد

أرجيه يغفر لي ذنوبٍ بلتني

ويالله يااللي تفرج الهم لي زاد

إنك تفرج ضيقةٍ طاولتني