يامدمزيل ياللي ف قصرك يازينه عصرك

المبسط يحبك على خصرك يتهز قوام

في الحرب بتواسي المجاريح فوق الطراريح

وتقلبي الغم بتفريح والنار بغرام

ومشيتك في السكه غزال وقيافتك عال

كدا سلت ملت مفيش خلخال وسخام لطام

ولا الايدين فيها غوايش ولا شيء حايش

كدا لهط مهط فطير بايش اشمط وانام

اللحم ابيض ومزقلط وبيتزفلط

والوش ده مش متخطط زي ام لتام

دول في المدارس ودوكي بيربوكي

الله يخليكي لابوكي وامك ياتمام

طلعتي حافضه جغرافيا وصحه وعافيه

حتى اللي هوه بلا قافيه حافضاه ياسلام

البنت عضو في اكاديميا وتعرف كيميا

خلينا احنا في الباميا والفقر التام

تمسك ياعم ايد التلفون مش ايد الهون

اللي تسمّع في الكركون والناس ح تنام

فين اللي تعتر في الحلّه وتكسر قلّه

من اللي تنقش دانتيلّه من البفته الخام

مفروده دايما لاتبوز ولا تتأوز

عازبه ولما بتجّوز تعمل له مقام

يبوسها قدام جمعيه وتبوس هيه

لا كسكسه في الحريه مسيو ومدام

مادام يحبها وتحبه وداخله ف عبه

مايسبهاشي ولا بتسبه من عنده كلام

اما الا نيته ام جلاجل تاخد الراجل

تركبه الفقر العاجل وتجيب له لجام

متجوزاه وعاملاه سلم لويتكلم

الضرب على صدغه يعلم اكفف واقلام

تدخل وتخرج ماتشاور عايزه اساور

ماتخلي شرطي ولامجاور ولا واد خدام

عليها حته دين عرقوب ولسان مسحوب

وصدغ اطول م المركوب وتياب قُدام

وجوزها يشرب بنوره وهيه طاطوره

تحبل وتولد بالطوره زي الأغنام

ييجوا العيال اللي يهرهر واللي يبربر

ودا اللي اقرع واللي اعور واللي له خزام

اطفال اوربا ف عربيات ومربيات

وبزازات وتبات ونبات ولهم حمام

لا ده ابوه مليارد كبير ولا دا ابن فقير

مادام دا يبقى طفل صغير تعذيبه حرام

قال الكرم خد اموالنا امال مالنا

يارب سايبين اطفالنا زي الايتام

مكومين كدا في الشارع روس وكوارع

والسلسله وعضم الذارع والباقي عضام

تدوسهم الساده الشماليل يعني المساطيل

المجعوصين جوا الطومبيل زي الاصنام

آه لما اشوف رزق الجاهل كدا بالساهل

صاحب وجاهه دا بيستاهل حكم الاعدام