الريق وجف وسلمت
روحى لسوابقها القديمه
شق اللسان خد منّى طولى
صبحت ملقى كما الرميمه
صفيت عرق
نبشت ألحس ف التراب
إن كان عذاب
ربى العظيم متبدلوش
لجلن يغيب يوم الحساب
***
الآه .. بتطلع من حشايا وتنجلى
والصرخة جوّه ضل الصوت ..
سكوت
إن راح أموت
جوّه الفراغ
عارف مدايا وسكتى
الجنه خير
والنار ..
بتحرق ف البيوت
لحم الفقير
***
غارت عنيه ع السحاب
ملقتش غير ضل البُنيه الملهمه
كانت تروح وقت المغيب
م بين شطوط الانتظار
تملالى وقت الخوف ..
شروق
لن كنت أفوق
ألقاها ف الحلم
انشطار
***
وفتحت قلبي ضرفتين
جوّاه وسيع
برّاه بينزف بالدما
تانى يميع
وطني المعذب كلّما
يرجع على برُّه
يضيع
***
والبنت شاطره
الغمز حفظاه بالرموش
صمّه المذاكره
وقت أما تغرق ازاى
تبوش
ازاى تحايل قلبي يحوش
منها العذاب
ربى العظيم متبدلوش
لجلن يغيب يوم الحساب .