الله اكبر يوم دق الهم بابي

راح ليلي يعزف أحزاني بنايه

أنجدل قيد البلاوي والتوى بي

لين شفت بنظرة العين النهاية

لاح لي زولٍ شرودٍ والتقى بي

جرح دامي جامحٍ بين الحنايا

من لمحته هان في عيني مصابي

وش عذابي مع عذابه يا هنايا

قلت هون قال حاولت وغدى بي

موتي أهون من حياتي يا شقايا

باع وقتي في خفوقي واشترى بي

يوم جيته راجيٍ خيب رجايا

قمت أعض من الزعل كفي بنابي

دام حظي ما صدق مرة معايا

يوم ضاق الكون بي توه صوابي

صدقوني هذه كل الحكايا

اكتشفت إني وقفت ومن عذابي

رحت اكلم صورتي وسط المرايا