نور عيني.. علميني كيف أبكتب لك شعر؟

وانتي نظره من عيونك ضيّعت كل المعاني !

انتي كلماتك عذوبه.. وابتساماتك مطر

وصوت ضحكك يحتويني وينثر الدنيا أغاني

أشهد إن العمر من بعدك ترى ماهو عمر

واشهد إني ماأطيق الغيبه من بعدك ثواني

من عرفتك لاحزن غطى عيوني ولاكدر

يابعد من شافته عيني وعن شوفك خذاني

جارت الدنيا علينا وحالت ظروف الدهر

لكن انتي ياأصيله دايم أكسب بك رهاني

واذكر إنك يوم رحتي صحت أنا صيحة قهر

ويعلم الله ماتركتك لين ماربي هداني

كل ليله تذكريني يضوي ف(ليلي) قمر

وإن جفيتيني في ليله أظلمت حولي المباني

عند بابك ياغناتي أنحر أشواقي نحر

من عرفتك ياطموحي وانتي لي كل الأماني

"يسألوني ليه أحبك حب ماحبه بشر

"هذي الغنوه "لراشد" لك تعبّر عن حناني

انتي ياعطر القصيد وطيش فكري والسهر

والله ماغيرك أحد يستاهل أبياتي وجناني

يابعد كل الخلايق واللي في بالي خطر

من دخلتي في حياتي مابقى لغيرك مكاني

أقبلي يانور عيني وتامرين انتي أمر

يااللي ذكرك يهدي عمري والقصايد جو ثاني

مالي إلا أعترف بعيون حسادك وأقر

إنك أحلى مارأت عيني وقابلت بزماني

قلت أبكتب لك قصيده وطاشت أبيات الشعر

ولا طرالي طاري اسمك ينعقد حتى لساني !