(عيدك مبارك) ياأجمل من سكن وجداني

كل عام وانت أغلى من يمر طاريّه

كيف أنا ماعايدك ياللي غلاك أشقاني

كيف أبنسى؟ وانت يوميا تجيبه فيّه !

أشهد إن العيد هذا غيييير وطعمه ثاني

يوم اشوفك فيه راجع لي مصفي النيّه

إنت تامرني ياعمري/ كيف تترجاني؟

بس أشّر لي وأجيلك كلي برجليّه

في غيابك زاد عشقي.. وكثروا خلاني

والله العالم لو أحسب وصّلوا للميّه !

كنت أبهرب من شماتة ربعي وعدواني

يوم تتركني لحالي أصطفق بإيديّه

لكن الحين انت في قلبي هنا وحداني

وكل هالميّه فوجودك حاجة منسيّه

ياغناتي.. ياربيع القلب.. ياتحناني

اضحك وخل الحياه ألوانها ورديّه

لابغيت أعزف وأغني بك تطيب ألحاني

والقصايد في وصوفك تنكتب عفويّه

والله إني يوم شفتك أورقت أغصاني

وأزهرت في صبح عيدي (ورده سعوديّه)

لارجع خلي لحضني وصار يترجاني

مانظرته مثل غيري نظرة دونيّه

الكبر لله ياقلبي وغير وجهه فاني

والله يعلم شوفتك في ذاتها عيديه

(عيدك مبارك).. لغيرك مانطقها لساني

كيف أبنطقها وغيرك مايمر طاريّه؟ !