شعب وملك مافيه شك ولاريب

الدين دين الله وحنا جنوده

برقابنا للبيت عهد ومطاليب

احمايته واكرام غالي وفوده

دون الوطن فهد العرب بالمواجيب

هدات ابو فيصل تجيك امحموده

في طاعة اللي يعلم السر والغيب

الفهد من دون العقيده فهوده

ان كانها باحكام الاسلام والطيب

ماله مثيل الله يديم بوجوده

فهد الا منه عوى الذيب للذيب

في موقفٍ يبين نقصه وزوده

مقضب ايدينٍ مالهنه مقاضيب

ماترتخي عند الشدايد اعضوده

ومن جاء يبي في مهبط الوحي تخريب

نقلع ذلوله ونتعشى قعوده

دون العقيده مالحد حقٍ مصيب

الدين دين الله وحنا عموده

ارهابيٍ يتبع اشفوف الاجانيب

الحد ورب البيت كثر شهوده

خوارج للكفر روس ومناديب

ورجّالنا صد الكفر مايكوده

نقطع بهم بسيوفنا اللي محاديب

حتى نواري جثته في لحوده