هلابك يامنى قلبن حلف لك ماهو غيرك

تمكن به غلاك وصار يثبت لك وبحلف لك

حلفلك ماحوى عرشه سوى اسمك وتصويرك

ومن شوقه يناديلك ويوله لك ويهتف لك

وفالك بالغلا الوافي وجارى نهجك وسيرك

وحصن نبعه الصافي لجل من ماه يغرف لك

غدير البوح عانق به زهو حرفك وتعبيرك

بكل اخلاص يعرب لك عن احساسه ويوصف لك

ومع ذلك تحمل جور شكاتك وتفسيرك

ومن اجمل ورود الحب يزرع لك ويقطف لك

هلا بك قالها قلبن سئم بعدك وتبريرك

ويحمد من قسم قربك و يخلص لك وينصف لك

وختام البوح افاخر بك واماري بزود تقديرك

واكافح لوعة الفرقا ببوحن صار يألف لك

واذا الدنيا واهلها بيوم ساءت مع مقاديرك

أذل الكل لعيونك وأفز بعز وأوقف لك