طيّبت فال الفوز يا طيّب الفال

يا (راشد المكتوم ) ما فيك حيله

الفوز بك ياعالي الشان يختال

والفوز يرغب كل راعي طويله

مبروك ما دنّت لك مزون الاقوال

ومبروك ما غِظْت بْمزونك مخيله

يا زاكي الجَدّين من عَمٍّ وْ خَال

يا بدرنا اللي في الدجى نستخيله

يفداك عَزم اللي تمنّى ولا نال

يا شوق ربّات العيون الكحيله

لك مجد قبل وْمجد حاضر ولازال

وامجاد لك في المقبلات الجزيله

يا (راشد) اتْعَبْت المدى والمدى طال

واللي تِبَعْك أتْعَبْت عَزمه وخيله

كم سقت خيلك بين رمله وْمِسْيَال

وشَيَّلتها بالحزم ما لا تشيله

يا شبل من تفخر بطاريه الاشبال

شبل الأسد لي ما يِحَفْل الهزيله

هذاك لى تَضْرِبْ به الناس الامثال

سهل التمثِّل به ويصعب مثيله

فارس يِهزّ بْهيبته ألف خَيّال

ظاري على حمل الحمول الثقيله

يدهل بغاياته على كل مدهال

دون المعالي ما تردّه عضيله

وانته على درب العلا قايد أبطال

والشبل من ذاك الأسد له حصيله

أشْهَد شهادة حَق والحق ينقال

لإنّك على الطولات ما في كحيله