ما حد خذا غيرك من الناس عمرين

عمرك وعمر اللي معك فات كله

وزود عليها صرت مالك لقلبين

قلبك وقلب فيك هام وتتله

حبك نزل في القلب بين البطينين

وفوق المعاليق الثلاثه محله

يسري غرامك بالدما في الشرايين

مسرى المرض في جسم من حسن عله

سيرتني برضاي ما قلت لك وين

معك على موج الهوى قلت يا الله

وش غير هذا أعطيك يا كامل الزين

روحي فداك أطلب وخذها تدله

مادام شوفة طلعتك تكحل العين

وما همني غيرك وش اللي حصله

نسيتني الماضي وناس كثيرين

وما كن فوق الارض غير إنت لله