ياللي تنظر في قصيد المراره

ليتك قدرت تجيب لو بعض معناي

قل غيرها تكفى وربي خساره

مثلك ويبدي راي وين انت والراي

ابسالك من وين جتك الجساره

انك تظن ان انت واحد من عداي

شرواك رجل عايش بانكساره

وشرواي ذيب يقضي الليل سرّاي

شرواك يكتب شعر لعيون ساره

وانا كتبت الشعر لعيون شرواي

مسطول خلقه ما اسطلتني زقارة

" فاصل " وأفكّر في متاهات دنياي

أقرا ملامح وجه خلف الستارة

واكتم جروحٍ مانفع فيهن دواي

هالليل به مني وفاه وسماره

وبه حزني اللي يطربه لحظة غناي

جاتك وما جاتك فضا هالعباره

بيت واحس اني نزعته من اقصاي

لو كان في حزن الاوادم شطاره

كان اشطر الشطار من " يعزف الناي "

تدري طريفة هالوجع والمراره

معناي ليتك فاهم بعض معناي