ياطور سينا لجرحك ما بكت سينا

يوم الليالي تناست عن مواجعنا

رحنا وجينا .. ورحنا مثل ما جينا

صيحة هل الخيل ما هزت مسامعنا

كنا نقول السحاب لحلمنا مينا

كنا وصار الثرى يحضن مدامعنا

ياليل يا ليل وين ايام ما ضينا

يوم السما صافية والعشب جامعنا

كان الزهر يبتسم بأقصى مراعينا

واليوم شوك الرحيل أدمى مرابعنا

يا ما التقينا على نغمة مبادينا

ويا ما افترقنا كثير ولا توادعنا

نقول باكر وباكر ينصدم فينا

لا شافنا عن كلام أول تراجعنا

والوادي اللي رفع صوته ينادينا

يوم اجتمعنا على اطرافه تنازعنا

نبكي على اطلالنا والجرح يبكينا

لا مرته نسمةٍ تلعن طبايعنا

ياجرح ياجرح ما فينا مكفينا

ياهم ياهم لا لا.. لا تقاطعنا

ياطور ياطور لا تعشق ثرى سينا

ان كان ماحس وش تعني مواجعنا