ياحي شيخٍ طرى والدله مهيله

ذكره توقف له الفريس قدر ومقام

يبين مثل الخشوع بلفظة البسمله

كنه يسوق البروق ويستثير الغمام

لا ثارت الخيل والميدان له زلزله

معروف لاقام ابو متعب ترى العز قام

يجيه منا كبير السن ويفز له

ويجلسه والهموم تصير برد وسلام

يآمر وكل السعوديه تقول ازهله

والشعب في حب عبدالله حشا ما يلام

هذي ديار الخزاما علموا الحنضله

من قدم المر تجتثه يدينا شمام

يا دار لالا يهمك كثرة البلبله

على العدو لا زهمتينا نشد الحزام

نجيه ريحٍ تحط اعلاه تحت اسفله

ويدفن من الخوف راسه مثل طير النعام

هذا السعودي كذا والكون مايجهله

وهذا ملكنا ليا غارت وثار القتام

يوم اعتزى ليلة الخفجي وفاض زعله

سل المذهب وغار وشق وجه الظلام

بينه وبين السيوف الحدب قرب وصله

في السلم هيبه وفي الشده يقص العظام

لو للكرم والرجوله والوفا بوصله

يشر سهمها على صقر العروبه تمام

سنابل الخير غنت سنبله سنبله

ومبادرات السلام تزف سرب الحمام

ياحي شيخٍ طرى والدله مهيله

ذكره توقف له الفريس قدر ومقام