يوم استوت والناس كايل وكيّال

المرجله ما كل عفنٍ يطوله

والأرض لو عديت مليانه رجال

شواربٍ تمطر سواد وفحوله

هذا شراله ناس بالجاه والمال

واليا رمى أو ما رمى صفقوله

لو ينكسر ما تنفعه هاك الأموال

دعوا عليه اللي بوجهه دعوله

وهذا يقول انه شجاع ٍ وخيال

والريح تتعب ما تعدّى خيوله

في داخله قلبٍ خبيثٍ ودجال

والخوف عشش بين عرضه وطوله

وهذا ليا هبّت رياح الهوى مال

وهذا يصلي والشياطين حوله

وانا رقيت المجد رجال رجّال

ياصاحبي حتى وصلت الرجوله

آقف وتاقف هامتي كني جبال

والعن زمان الذل واللي خضعوله

بين الطموح وعزّة النفس رحال

للمجد خطواتي تسابق عجوله

أبوي يمشيلي وانا خلفه ظلال

يمكن تميل الشمس وآصير طوله

مابي من ايامي سوى راحت البال

وشعرٍ يونسني وبنتٍ خجوله

وغيري ليامنّه حفظ كم موال

احفظ كتاب الله وسنة رسوله

اليا حضرت آشرف العم والخال

واليا حكيت اوزن كلامي واقوله

وان غبت قالوا شاعرٍ طيبٍ قال

المرجله ما كل عفنٍ يطوله