الغياب..وهّاب
الغياب..
يلبِّّسْ من تحبّ ثياب..
من وَرْد
والوَجْد ..
يعطي الذكريات اليابسه..
نبْض ومشاعر..
.. يكسي جفاف احزانك الصفرا ..
ملامح ..
من ندى واعشاب
الغياب
مجنون.. يرسم ...
للشبابيك الضّريره..
عيون خضرا..
تخلّي شوك البعد ورده..
والحصى ..لبلاب
الغياب لو تدري يفتح..
للخيال ابواب
يعيد تشكيل الصور
ويجمِّلْ الأحباب
والحبيب اللي تحبّه
مهو نَفْس ذاك الحبيب
لوغاب
ف الغياب ..
الحبيب يصير أَجمل
الحبيب يصير أشهى
وماتشوف في من تحب
غير ماتحب
والخطايا..
تصير هدايا..ترتجيها
ويورق الغفران عندك..
من سراب عْتاب
ف الغياب..
الحبيب يصير أعذب
الحبيب يصير أقرب
يمتلي بوجهه مساك
تمتلي بنوره سماك
يمتلي بأسمه نِداك
يصير كلِّك
وكل شي له يوديك ويدلّك..
تحسّْ كِنّه..
ساكن ف أوضح مراياك..
وفي ظلك
وبلحظه ماتدري وش اللي..
شجّر ايدين المدى..
عِنّاب
لا ولاتدري وش اللي..
حنّنْ الفرقا عليك
رقّت وخلّت حبيبك ..
في ظماك ينساب؟
لا ولاتدري وش اللي..
يخلّي شوقك..
دوم يفتش..
في حقايب الوصال
ويسأل بلهفه عن اللي..
من عند الحبيب .. لك جاب
وتسأله لو كان يقدر
ياخذ شوية هدايا للي غايب:
بعض اغاني..
تطرد الوحشه في صدره
وشال دافي للشتا
وشمس لليل الطويل
وسقف يحميه ومظله..
حتى لايبتلّ شَعْره
لاهمى حزن البعاد..
والوجوه أغراب.
وياخذ لخيمة رجاه..
من رجاك..أَطناب
الغياب..
يشفِّف القلب ويسرِّج..
ف الحنايا.. شْهاب
ياحبيبي..
غِيْب لو ودّك تغيب
ف الغياب..
تصير فيني حاضر أكثر
وقلبي رغم البعد يقدر
يوصلك من ألف سكّه..
ويدخلك من ألف باب
الغياب..وهَّاب