عزّ.. عز..ورايتك دايم عليّه

يحتضنها المجد في روس النوايد

عزّ يااكبر دولةٍ شرق اوسطيّه

واوسع ارضٍ فوق هالسبع الشدايد

ما تضيق ارض ٍ بها كف سخيّه

ما علي من رسم الاطلس والجرايد

انتي اكبر دولةٍ بالمقدريّه

قدر أرض .. وقدر شعب .. وقدرقايد

وان رجعنا للغنى والله غنيّه

الفقيره دولةٍٍ من غير زايد

زايد ولو في العرب زايد سميّه

ما على" زايد" من اهل الطيب زايد

جود.. رحمه.. طيب.. حكمه.. عبقريّه

بر.. دين.. احسان .. صبر ٍ في الشدايد

ساد شعبه عدل من عصر المطيّه

لين عصر العولمه والعدل سايد

من جلس والعدل قام وشعّ ضيّه

وامست الظلما عن بلاده بدايد

شيخ يا شيخ المشاعر يعربيّه

والقصايد سيّدي تبقى قصايد

قلت ابارك لك وابلّغك التحيّه

يوم جا " عيد الجلوس" اقبلت اعايد

كل عام ودارك بظلّك هنيّه

كل عيد جلوس وانت "الشيخ زايد"