يا شمس عمري والخليقه كواكب

غديت نجم ٍ في مدار المواليف

عشّاق حسنك في بحورك مراكب

خطّوا رسايلهم بروس المجاديف

نظراتهم زفـّت حضورك مواكب

واوصافك بليلة سمرهم سواليف

زحمة عيون !!وهمس ، زحمة مناكب

كل الوجيه بـْدرب بيتك معاريف

للورد في دافي شفاتك مساكِب

والموت له في كحل عينك تصاريف

يا بنت انا ما جيت للدمع ساكب

هي غلطةٍ و اقفت مثل غيمة الصيف

بالقلب جرح وللوسيعه مناكب

عن قلبك اللي شحّ بفوالة الضيف

لا شك أوهن بيت بيت العناكب

واقشر غرام اللي من الزيف للزيف