رفرفت في بالي اوراق بيضا مهملـة

واشتهى صمت ابيض الجوع تفاح الكلام

مثل طفل ٍ كان يبنـي ويهـدم منزلـه

في هديل البحر واصطادته موجة حمام

جيت لاسهم ٍ تناسـى ولاجـرح ٍ دلـه

عن هوى اللي ينزعون الجروح من السهام

جيت للدنيا قمر وجه صوتـي حنظلـه

تحت جلدي ذاكرة خبت من رمل .. وعظام

لي سما عالي وحفنة سديم و.. وسنبله

سبحت فيها وغنت عصافيـر الغمـام

كن من روّع ضبى خبت دمي واجفلـه

وارتبك في حانة الصيف طاروق الصرام

كلمـا قربـت للريـح نـار ٍ مشعلـه

فوق صدري زادني جمرها برد وسلام

كيف خيلت آخر الوقت قـاع ٍ ممحلـه

كيف خيلت آخر القـاع وقـت ٍ للهدام

وش هو آخر دربنا .. آخر الدرب اوله

لاهمزنا مهرة الوقت وانـزاح اللثـام

كل درب ٍ تعرفه حـاول انـك تجهلـه

الدروب لصمت وجهي .. مجاهيل وظلام