خلوها يا أهل الشعر وأخماس الأسادس

قصيدتي هذي خطيرة مثيرة

لله وللتاريخ ولكل هالناس

ولهالحياة الزايلة والغريرة

وإلي ما هوب لذروة الفكر عساس

ينظم لأصحاب النفوس الكسيرة

الله الأول من قبل لفظ الأنفاس

عز وجل من الظنون الصغيرة

ما مثل مثله مثل ولا له أجناس

يخلق مخلوقه ولا يستشيره

أذل له وانصاع له وأحني الرأس

إلي جعلني ما عبد رب غيره

عساه يكسوني من السندس لباس

في يوم يعرى به أمير وأميرة

شاعر وذنبي غير وسكوتي أجراس

ونفسي على ما الله عطاها فقيرة

من كثر ما أعطي حب وأخلاص وأحساس

أنا ما عاد أعرف وإيشلون اصيره

في عقلي الباطن عقيدة ونوماس

وفي واقعي خوف وتردد وحيرة

هل يا ترى ببني على حلمي أساس

أم يا ترى ببقى على هالوتيرة

والأفلاس ماهو افلاس من حلم ! الأفلاس!

إذاك ما تملك لنفسك بصيرة

ما خلق شيء إلا بقدرٍ وقياس

ما شي يغلب شي أو يستعيره

إلي خلق خوف وخلق ضيقة وياس

خلق أمن وأفراح وحب وبريرة

لذلك الله لا يوليني أنجاس

ويكسوني بفضله ومنه وخيره

الرب إذا تحتاج له صرت نبراس

الإنسان إذا تحتاج له صرت أسيره

والناس ! ناتج ناس استلطفوا ناس

أبناء رغبة واستهامة وغيرة

لولا التلاطف والي ما بين الأقواس

ما شفت هالعالم شفوحة غفيرة

ندور ويدوربنا كل هوجاس

ومن أجل ذلك روسنا مستديرة

الكل تايه في مصيرة ومحتاس

وما هو بهو إلي يحدد مصيرة

فياليت ما تنسى الذواليق غراس

وما ينسى مجرى المياة وخريرة

أعلم الي عاث من بعد ما جاس

ترى الجهل رأس الأمور الشريرة

وين الملوك الي على قباب الأفراس

راحوا وخلوا المغريات الكبيرة

الأرض يالي بأرض الناس تنداس

بواقي إبن ادواد وابن المغيرة

صغيّر الادراك وصغيّر الباس

يحسب كل الناس مثله صغيرة

يا قلب برد كل ما هب نسناس

ما دام هاليمنى ندية جديرة

يفداك من رزقه قتات وتمراس

لولا رئتينه ما طلع زفيره

شفاه من طرد الملاذات يباس

واهو على عد الرواه وغديرة

حديثه فما قال حمزة في عباس

ما حدث المسلم عن ابو هريرة

العمر فرحة وحدة وعشرة اتعاس

ومن لا يجيره خالقه من يجيره

ومن عاش شاف وكل غبة بغطاس

والصدق خيرة ما ذخرته الذخيرة

كل ما اكتشفت من الأصاحبيب بلاس

أقول يالله جعل في الأمر خيرة

خيرة تعرف إن به من أصحابك خساس

خيرة . ويا عساها الأخيرة

وبعض البشر مثل ابتسامات الأعراس

على كثر ما هي مثيرة . ضريرة

والكل ما يخلو من أخباث وادناس

في كل نفس هناك . حاجة حقيرة

فمن قبل ما اسوي مشاكل مع الناس

عندي معا نفسي مشاكل كثيرة