لانه عصا وفر سموه عصفور

وياكثر عصفاره كبار الاسامي

كل ماتضيق صدور تستاسع صدور

سنّه من سنن الزمان الهلامي

ولا زاداد سعر النفط نتزايد فجور

سنه من سنن الزمان الهلامي

ودايم وراعي الحق مهجا وحذور

.. .. سنه من سنن الزمان الهلامي

وبيقاله بكرا : ترى منت مجبور

وباقول للي قالها : ياعظامي

الصبح لو مايدحر الليل بالنور؟

تعيش عمرك كلبوه ف ظلامي

سجل ياتاريخ الشعر اصدق سطور

انا سعد علوش والمجد زامي

اعيش عيشة فقر واموت مقبور

ولا احني راسي واغير كلامي

شاعر واقود اجيال واعطش بحور

عصامي وشعري سولتس عصامي

ماكدبّه على نساوين وبزور

احفظ مقامه مثل ما احفظ مقامي

ومن قبل حتى اكون شاعر ومخبور؟

لي رايي المطلق,,ولي اهتمامي

واضح وامثل خيرة الناس واثور

لامن سمعت ان التغافل تسامي

ف يارب لاتجعلني اسكت على زور

واجعل حسناتي مقاصيص اثامي

ولاتفرشني على كبد ممرور

ولاتعرض بي لسان انتقامي

لان الحقيقه سم واظهارها جور

على القلوب ام الجهل والتعامي

وانا حقيقي فكر وشعور وظهور

ومانيب اجر كشرتي وابتسامي

ف باقولها وبيصير هالقول ماثور

مع عدم شكري وبالغ سلامي

المجتمع غالبه رجعي ومغرور

وفارغ من الداخل وساذج ونامي

ابنا القبايل واهل السيف والكور

قتالهم على المسجات حامي

لو هالملايين انفقت وطهور؟

على البنى عم والجياع الضوامي؟

ماشفت شحاذين وديون وعثور

بين القبايل هاه وين التحامي؟

صفو يا اخر جيل فالشعر طابور

قدامكم ليل ووراكم حرامي

بالدور بالله اوقفو زين بالدور

ويلقي الكوميدي قبل يلقي الدرامي

والكل منهي في وقوفه ومامور

الوقت ضيّق والتقيّد لزامي

وماهو مهم يكون لك فكر وشعور

اهم شي تكون شاعر نظامي

ولافيه لالجنه ولافيه دستور

الاسم سامي طالما الاسم سامي

ياصاحبي ياخي ياشاعر يامغمور

ماهكذا تعرف وتشهر الاسامي

شالفايده تصير شاعر ومشهور

اذا انت تبعي موهبه وانهزامي؟

لان اللي يطلب من رعاع العرب شور

ماهوب اهل للمعرفه والتسامي

ادري بتزعل ناس وبتلف وتدور

وبتقول فيني قول جارح ودامي

وبتجي ردود العالم العري والعو

مثل الخريش اللي بليا خطامي

لكن عزاي اني مع الحق مسرور

لو تزعل اخوالي وتزعل عمامي

عن قول كلمة حق مانيب معذور

مباديء خلفي وقبري امامي

عادي اخسر اصحاب واخسر جمهور

اهم شي اني ما اخسر احترامي