تفرق الغيم عن راسي وانا ما شربت

مابل قلبي بماه ولا ارتوى وابله

قد شدني لمع برقه بالسما وانجذبت

ظميان والروح من كثر الظما ذابله

ياحارس التيه انت بصفحتي وش كتبت

اللي قضيت العمر كله وانا اعابله

لو مايقولون عليت البكا وانتحبت

بس بيقولون مجنون .. الهوى هابله

البارحه كنت احس اني كثير اقتربت

واليوم ابعد وياخوفي من القابله

ابطلب العذر سامحني حبيبي تعبت

واببتعد عنك لو نفسي مهي قابله

عاشرت انا الصدق في دربي واظني كذبت

مره .. وطاح القمر فالليله الحابله

ما اقول انا الشعر لكني اقول ان ذهبت

بيذكر الشعر في النسيان من غاب له