طفشت من الظلام ولا لقيت النور يامولاي

تكرم والتفت يمكن تطيح الشمس من عينك

عقب هاك الفراق اللي جلدني لين جاب أقصاي

حلفت إن الفرح عطر تنشقته من يدينك

نطلت شماغي ولك جيت أنا ياسيدي برضاي

معي كل الجنون اللي صرخ من قلتلي وينك

على هونك تلمس حبك بقلبي وغن غناي

ترى كلي فدا بعضك فدا كلك فدا زينك

رحلت وصارت الدنيا تجاعيد وعلامة فاي

قضا كل الكلام ولا قضت مدة مساجينك

تجي لحضه وأحس انك حبيبي غايتي ومناي

وتجي لحضه وأحس انك سقيت القلب سكينك

معك مهما يكون وكان انا لي خافق نساي

نسا كل العذاب وجاك يذكر عطفك ولينك

أمانه لا تعشمني حبيبي بالزمان الجاي

يكفي بأن رجلي ماتدل إلا عناوينك

طفشت من الظلام وقلت هات النور يامولاي

طلبتك تلتفت وأثري عثرت وطحت من عينك