لاتكّدر خاطرك ضيقة حبيبك يوم قال

أيه أحبك يابعدهم بس أنا وين آغدي

ضيقتي ماهيب بس اليوم يابنت الحلال

ضيقتي لها ثلاث سنين تاكل من يدي

ضيقتي مافي وفاها يابعد عمري جدال

كل ليله تبسط يديها وتفرش مرقدي

ودي أسكت بس أعرف الحظ لامن مال مال

لي متى والصمت ينهش في ضلوعي وجسدي

شوفة عيونك هموم وضيق خلق وقل حال

وش أسوي دام حظي يابعد عمري ردي

هي كذا عيشة حبيبك لو تظاهر بالكمال

أقرب أيامه سعاده بعدها بعد الجدي

هي كذا وأنتي بكيفك مابقى فيها سؤال

فيه دمعه في عيوني تنتهي أو تبتدي؟!

كلها مابين كلمة روح أو كلمة تعال

كلمةٍ فيها أضيع وكلمةٍ منها آهتدي

هذا كل اللي بقوله وأعذري قل الوصال

والله أدري بك زعلتي بس أنا وين آغدي