حبيبي دام انا أصلاً حبيبك وانت والفني

اجل وشفيك تزعل يوم افضفض وانفض ايامي؟

انا لولاك قلت : "ان الزمن باموت ما انصفني"

وانا لولا الزمن ما كنت اهوجس وانت قدامي

هي الدنيا كذا لا جيت ارتّب للكرى جفني

تكاثر غفوتي حتى تصير ابعد من احلامي

هي الدنيا كذا و ان كان ما صدّقتني شفني

شف عيوني وشف وش لون جلدي يستر عظامي

شف أو لا لا تشوف ان كان ودّك صدق تعرفني

تتبّع سيرتي او سكتّي او جرّة اقدامي

تتّبعني واذا مرّيت دمعي لا تضاعفني

تعدّ بخطوتين وشف طموحي كيف مترامي

هنا طحت وهنا حظي عثر وهناك وقفّني

وهنا ماردّوا اللي كنت اناديهم بالآسامي

تهجّى فالمواني لين تقرا سالفة سفني

تتبّعني من اول جرح واترك عنك هندامي

وانا اقول : "ان تشوف اللي يحدّك ما تحلّفني

وش اللي حدّني ابقى على جال النهر ظامي"

امانه بس لا تزعل عليّ ولا تخالفني

لو ابكيتك من همومي او ابكيتك من هيامي

انا لولاك قلت: "الوقت هذا ما يشرّفني"

ولولا الوقت قلت اني خذيت اكبر من احلامي !