يا بديع الحسن والعقل المفكّر

الوصال يحب والهجران يُكره

أنت تدري وش ورا الباب المسكّر

لا تواعدني على الليله وبكره

عل وجداني من الوسم المبكّر

اللي والله ما حصلي غير ذكره

من تذوق له عسل صافي وسكّر

صار عنده صحوةٍ من عقب سكره

ما يجازى بالتجني والتنكّر

من خذيت بنظرتك عقله وفكره

كن لطيف ولطف الجو المعكّر

تستحق إجلال عرفانه وشكره

أنت ما يخفاك بس أحب أذكّر

وادرج الهرجه على موجه ومكره

لابسٍ ثوب الجميل ولا تشكّر

مير قلبي حرٍ أشقر وأنت وكره

ماتبي تفكير يالعقل المفكّر

الوصال يحب والهجران يكره