شاعرٍ له مع هل الطولات والعليا مقامي

جاء يقول الصدق لو كان اعذب الشعر اكذبه

في زمانٍ صار عذب الشعر من حشو الكلامي

والقصايد روّحت عذراء ورجعت ثيبه

يرتوي من جم معناه المعاطيش الحيامي

الشعر يكتبه مانتّف شعره بيكتبه

يارجيلي عانش الله في غبوشش والجهامي

السنين عجاف والدنيا قفارٍ مجدبه

والله اني ماقدرت اصبر وانا مقهور كامي

من ورى صبري على ضيم السنين المحنبه

كنت اخايل بارقٍ ضوحه فتق صدر الظلامي

نوب يجذبني سنا برقه وانا نوب اجذبه

بارقٍ خاين كذوبٍ ياعيوني يالحلامي

عادته يجهرش نوضه لين تقذيش اشهبه

البلا اني كل مادورت لأسم من الاسامي

طحت بإسمٍ ضايعٍ معناه وازريت اعربه

شرهتي ياكبرها يادرع جنبي ياحزامي

الهبود الجرب ينشر في حما الذود جربه

واللحى يادرع جنبي ستر لوجيهٍ حشامي

وانت تدري ماستر وجه الثعل غير ذنبه

ماعطيت اللاش وآخيه الثعل جل اهتمامي

ابرن بين الثعل واللاش وش وجه الشبه

وان تبي تعرف علامي يوم تنشد وش علامي

لدّ عينك يم نجم سهيل والشوف اندبه

فاطري تضلع وانا صدّرت جم العد ظامي

نذر ياعدٍّ يمنّ الماء لاموت ولا اشربه

ومن بنات الفكر في فكري ثمانٍ بالتمامي

سبع منهن طاهراتٍ غير وحده مذنبه

عاربه يالعاربه ياللي عيونش ماتنامي

ماقذى عينش سوى سبّابة المستعربه

جعلها تبطي الحراميه على ذمة حرامي

الحنش يلقى الحنش والعقربه للعقربه

مادفن وسط الثرى راسه سوى ربدا النعامي

ومن عجز يادّبه ابيه يحصل اللي يادّبه

ياحلالي والله ان تخسا يدين ابن الحرامي

ماتنوشش حد لي عرقٍ يدق النبض به

ووالله ان تبطين وانا اهيم في حبش هيامي

ويبطي اسمش نقش في قلبي ولا احدن يشطبه

فدوتش من تردف الغدفه على مثنى اللثامي

عذربيني منش ياحلو العذل والعذربه

وابشريبي ماكرٍ ماطاح بشْبكة الحمامي

من حرار الطير لامن جاع شبع بمخلبه

ميل لاهبت هبوب النود يا عود البشامي

ميل والعوشز عجبه او جعل عمره ماعجبه

(قزوعي يالقزوعي) ميّل على (ربخة تهامي)

ادقل ( المدقال) عرضه عقبها (اللعب ) العبه

ماذخرتش يايميني في رجا طق الدمامي

ولاني اللي هز حقوه عقب ماطق رْقبه

يانما ماكل من شل (ام خمس ) يصير رامي

كل وادي خابرين ماه ونعْرف حطبه

يانما هرشك فطيحه لاكبر جاه السقامي

الجرب قبل يتعرش غارب الهرش اكربه

والذلول اللي شحم وركينها كبر السنامي

اعرف ان السّن نابت في جماها وانتبه

قدهي توّرد وتصدر مايعقّلها الخطامي

والردي اللي زملها نوخته بتركبه

يانما في ذمتي من لايضيم انه يضامي

ومن كبر راسه كبر صالبه وابطى يتعبه

ياعسى ليل الشتا يخطيش برده ياعظامي

ياذلولي درهمي مابين ( بيشه وتربه )

وياخوالي كل ماهتز القنا بانخى عمامي

مايقص الراس غير اللي بحكمه ركبّه

مانتخيت الا ( دحيم ) مخضبة حد الحسامي

لابةٍ لو هازاها جنّي تجن الجن به

والوفا مثل الدخيل اللي زبن وجه الكرامي

طامنٍ في لحية النشمي ويطلع بشْنبه

ماشبعنا شبعة المعدوم بايام الصرامي

لو مكالفنا تغني ( حبنّا ياجندبه)

والقليب اللي جمع (شهري بقحطاني ويامي)

والله ان تسفح عجوزه دمعها من يقربه

وياسلام الله على دار الوفا واثني سلامي

من جنوبه للشمال لمشرقه ولمغربه