ياالدرب ياللي نحرت المهمه الخالي

عرفتني !! يابعد هالخبت ودروبه ؟؟

عرفتني يا موديني هوى بالي؟؟

من قبل مادله واقول التوبه التوبه

الله مااوفاك ياشوق اشهب اللاّلي

تذكر خويك ثلاث سنين محسوبه

يادرب الاحباب ياما كنت تطرا لي

بالذات لا شفت محبوبٍ ومحبوبه

والشوق يوم يتمكّن دالهٍ سالي

ذكّّى التعب في ملامح وجهه شحوبه

لاعاد يوم ٍ تمادى الشوق بهبالي

و شريت معطوبةٍ من ربح معطوبه

كنت اتحرّا ضمير ٍ غاب يصحى لي

خلقه ربي كذا صحوته غيبوبه

جيتك وانا احضن سوادك باابيض الفالي

ورجعت والفكر سج ّ يراجع ذنوبه

راح يتهجا يدوّر باول وتالي

ذنبٍ جنيته وصاروا لأجله عقوبه

اللي غدا المرّ لرضاهم تقل حالي

واصبح غلاهم مجرد مزح واكذوبه

من عقب ماشتتوا عمري بروا حالي

ثم اتركوني جسد والقلب قفوا به

كنت احسب الدار هي داري ومنزالي

آثر العرب بدّلوا وش هو ب وشهو به

يرجون ( ابو زيد ) وانا ماني هلالي

انا سنافي على قوسه لبس ثوبه

اشوف جدّاني بعين اصغر عيالي

الطيب والمرجله ورثٍ تواصوا به

تقل ان ( جدي ) قرى كفي وفنجالي

يومه يحذرّني من الوقت واسلوبه

يرحمك عودٍ جميع اقواله امثالي

يقول قبل يتوسّد راسه الطوبه :

في جيبك ريال فانت تساوي ريالي

هالوقت صار السنافي قدْره جيوبه

يمّا حداه الزمان لكل دجالي

يمّا يصير الوفا والطيب عذروبه)

وش لي وبير ٍ خلط بزلاله حثالي؟

آموت ظامي ويخسى البير وغروبه

بارجع واصلي صلاة الغايب اشوى لي

حتى يوافي خفوق ٍٍ غاب مكتوبه

يالدرب ياللي انكتب ممشاك غربالي

نسيتني دارهم وش حدّني صوبه ؟؟

الاّ تذكرت ! جيت اقول يالغالي :

ليا جوك قول الدحيمي قال لي دوبه :

اليوم والله لو يطرون في بالي

قمت اتوضّى وارتّل سورة التوبه