امسح الدمعة ترى ضعفك قوي

انهزم قدام ضعفك ياغلاي

امسح الدمعة بعمري لو تبي

عطني احزانك وخذ مني هناي

امسح الدمعة قبل تقضي علي

دمعتك تغرق صباحي في مساي

لاتروع مثل روعات الظبي

روعتك ياروعة ايامي بلاي

كل ليلٍ مع نهارك ينجلي

يابدايات الهوى يامنتهاي

ياوطن قلبي وغربة ناظري

ياحتياري ياصوابي ياخطاي

يابنات الفكر غني وارقصي

عند خلي وانشدي له من غناي

واسعي صدر الحبيب واطربي

طربتي له كلما ذعذع هواي