يامدور الهيّن ترى الكايد أحلى

و أسأل مغنّي كايدات الطروقي

الزين غالي لكن الأزين أغلى

و الكلّ شرّاي ٍ بضاعة وسوقي

النوّ عالي و السما فوقه أعلى

و لا فاق علم ٍ جاه علم ٍ يفوقي

الصعب هلاّ قلت يا صعب سهلا

دامك تبيني فأنت يا صعب شوقي

أحب اعسف المهرة اللي تغلّى

و أحب أروّض كل طرف ٍ يموقي

و أحب أسافر مع سحاب ٍ تعلّى

و أحب فوق الغيم لمع البروقي

و أحب أساهر بدري اللي تجلّى

و ارسم شعاع الشمس عند الشروقي

يا من على ثاير فؤادي تولّى

خلّك على قلب الكرامه شفوقي

أكرم عزيز ٍ بالعمر مستذلاّ

يسوق عمره للمشاريف سوقي

اخترتك من الناس للقلب خلاّ

يا حيثك مرادي و كيفي و ذوقي

ما رحت أدوّر كل زول ٍ تحلّّى

لولاك تسوى ما عطيتك خفوقي