ما علي إخلاف . . أقول اللي أبيه

من فضل ربي علي إني قوي

إلا حبك شي ما أقدر عليه

كن حبك ضيف . . والقلب ابدوي

أنت بس اللي أبيه . . ولا أجيه

عنك حظي لاوي ذراعي لوي

صرت لي مشوار لاجيت ابتديه

إن لقيت الدرب . . ضيعت الخوي

وين رااايح؟؟ جعل هالزول افتديه

وأنت خااابرني من البعد انكوي

رد . . يا منهو حياتي في يديه

لا تخليني وأنا لك مهتوي

إن خسرتك وين أبلقى لك شبيه؟

وأنت من كل شي نااادر تحتوي

أنت حتى الجرح منك اشتهيه

من غلاك . . اضم عذابك وارتوي

أنت لا سولفت ما كني هنيه

التزمت الصمت .. كني منطوي

ليه أسولف لك . . وهي من غير ليه؟

تعرف إنك تطوي أحزاني طوي

أنت حبك شي ما أقدر عليه

كن حبك ضيف . . والقلب . . ابدوي!