ياللي تحد قلبي على أقصاه

ماعاد بي حيله على الضيق

وقت الردى كل شي سوّاه

رخومه تذم المطاليق

ماعاد اطيق الهم وأقواه

شلت بشبابي فوق ما اطيق

ذي آخر أحوالي وطرّاه

يومك تقول إن كني طويق

إيه والله إن فيني مزاياه

وإن بيني وبينه مواثيق

بس صاحبك ماجاه كفّاه

مليت من قولة توافيق !!

حتى الشعر شكلي أبظماه

ماعاد تغري بلّة الريق

كانت معاليقي تمنّاه

واليوم !! هو جرح المعاليق

يطري علي واقول عزاه

يانشوة الفرحه ابتصفيق

واطري عليه ان تاهت اخطاه

يلمحني بروس الشواهيق

حتيش لو إنّا حشمناه

ماتردع الحشمه مطافيق

في ذا الزمن ماتت بقاياه

روح امسح دموع الطواريق

غنّى لك اللي متعب اغناه

لاجر صوته همّه يفيق

لايكتب الضحك ولا يقراه

كنه لحزن القاف عشّيق

بتصدق شعوري !! أو إنساه

بصرك ترى ما احتاج تصديق

قد قلت لك واوصيتك وصاه

لاتنبش جروح المخاليق !!

هالقلب لاتحده على أقصاه

مالك ومال الهم والضيق !